قصة جرحها ( ........ ) و داواها ( ........)

مشكورين ع المرور

:×:×: الجزء الثاني :×:×:


وعقب اتصلت ظبية بعلي عشان ايي وياخذهم ووصلوا شيخة بيتهم ويوم دخلت ظبية الصالة لقت امها وابوها
ظبية +علي: السلام عليكم
ام علي +بو علي: وعليكم السلام والرحمة
وراحت ظبية تحب راس امها وابوها ويسلت تسولف وياهم شوي ...ونزلت منى من فوق
منى: شحالج ظبوي
ظبية: بخير يعلج الخير ...تعالي شوفي البدلة اللي يبتها لج ومعاها شنطة وجوتي
منى: اللللللللله حلوين مشكورة حبيبتي بطلع اجربهم ...وطبعت منى بوسة رقيقة على خد ظبية وطلعت فوق ويلست ظبية اطالعها ومرسومة على شفايفها ابتسامهة صغيره ...ظبية تحب اختها وايد...منى بطبعها هادية وانعزالية ما تخالط الناس وما تحب تظهر من البيت وايد وهي خجولة بشكل فظيع تستحي حتى من ابوها
علي: ابويه ...اماية
بوعلي + ام علي: عونك يا ولدي
علي: باجر بغيت اسير العزبة
ظبية: اللللللله ابا اروح ابا اشوف الخيول من زمان ما شفتهن
علي: انتي انثبري مكانج ما باخذج وياي
ظبية: امايه قوليله ...ابويه قول شي
بو علي: خذها هي واختها وياك
ام علي: هي ولا ماشي سيره
علي: زين زين باخذهم
ظبية: هي هي يعيش ابوي تعيش امي ...بطلع اشوف مناية اذا بتسير ولا لا
وتطلع ظبية الدري وهي تتنطط
علي: صدق خبلة اللي يشوفها ما يصدق ان عمرها 20
ام علي: خلها براحتها
ظبية ادق الباب على منى
منى: منو
ظبية: انا ظبية
منى: دشي حبيبتي
دشت ظبية فجت حلجها عشان بترمس فجأه سكتت وبطلت عيونها
منى: ظبوي شو بلاج
ظبية: اللبس
منى: اذا طالع مب حلو علي بفصخه
ظبية: شو تفصخين البدلة وايد حلوة عليج طالعة رهييييييبة
منى بعد ما توردت خدودها: لا تبالغين عاد (ظبية ما كانت تبالغ كانت منى صج طالعة تخبل)
ظبية: والله ما ابالغ
منى: اصلا لو ذوقج مب حلو ما كان بتطلع البدلة حلوة علي
ابتسمت ظبية ومسكت ايدين ختها ويلسوا على السرير
ظبية: اقولج مناية باجر بنسير انا وعلوي العزبة تعالي ويانا دخيلج
منى: اسمحيلي حبيبتي تعرفين انا ما احب اظهر وايد من البيت
ظبية: براحتج غناتي يالله انا بسير ارقد الحين تصبحين على خير
منى : وانتي من هل الخير
وطلعت ظبيه من حجرة منى واتعايزت تنزل تحت وتخبر علي ان منى ما بتسير فسارت حجرتها ويابت طبلة ويلست علىالدري ويلست ادق وتقول علااااااااااااااااوي يا علااااااااااااااااااااااوي تعاااااااااااال يا علااااااااااااااااوي
علي وامه وابوه سمعوا حشرة ظبية وتموا يضحكوا ضحك
علي: هههههههههههههههه ظبية ما تيوز عن سوالفها هههههههههههه بسير اشوفها شو تبا
ويوم علي وصل عند ظبية قال: اييه ايه انتي بس بس انا هني (ظبية تعاند وتزيد الحشرة)
علي: تعانديني ها انا براويج وسار يلس على الارض وياب الطاولة الصغيره مالت تيلفون البيت ويلس هو الثاني يدق وتموا على هالحال لين تعبت ظبية ويوم وقفت ظبية وقف علي
ظبية: حشا تعبت
علي: والله محد ضربج على ايدينج شو تبين يالسة تزقريني
ظبية: بس بغيت اخبرك ان مناية ما بتسير
علي: ول خيبة تخيب العدو ومسويه هالحشرة عشان تخبريني هالكلمتين
ظبية : شو اسوي اتعايزن انزل ...يالله بوي انا سايره ارقد باااااااااااي
علي: ههههههههههههه باي
ويوم صكت ظبية باب حجرتها قال علي : خبله الحمدلله والشكر
ظبية : سمعتك يالخبل
علي: حشا مب اذن احسن لي افل لا تفلعني بنعال
ظبية سمعته ويلست تضحك بس فجاة اختفت هالضحكة وصارت ملامح الحزن باينه على وييها اتذكرت مايد وكلامه هي مب راضية اتخبر حد عن معاملة مايد لها لانها ما تبا تسوي مشاكل بين ابوها واخوه الوحيد اللي هو عمها وهي حتى ما تدري ليش مايد يعاملها بطريقة جافة
وما قدرت تمسك دموعها اكثر عن جي ويلست تصيح في غرفتها يمكن الصياح بيخفف شوي عن ثقل صدرها وتنزل ظبية دموعها الغالية ...تنزل دموع ظبية على انسان معدوم المشاعر ...معدوم الضمير ... تنزل على واحد ما فيه ذرة انسانية ...ومع هذا كله ظبية ما تبا تكدر نفسها على واحد ما يستاهل تحاول انها دوم تكون تضحك جدام اهلها ...اهلها اللي ما تعودوا يشوفوها زعلانة ابد ويوم تعبت ظبية من التفكير رقدت لانها تعرف التفكير ماراح يحل المشكلة وظبية ما تحس باي مشاعر اتجاه مايد ...بس هي حاطه في بالها ان بنت العم لولد العم
اليوم الثاني
الصبح نشت ظبوي من وقت عشان بتسير العزبة ويا اخوها علي وسارت حجرة علي عسب توعيه
ظبية: علييييييو قوم بسك رقاد
علي وهو يطالع الساعة: حشا بعدها الساعة عشر وين تبين انتي
ظبية: الظاهر انك نسيت ...البارحة قلت بنسير العزية يالله نش عااااااااد
علي: اووه صح ...انزين نص ساعة وبقوم (وتقلب الصوب الثاني)
ظبية وهي تسحب لحافه: بتقوم ولا اييب لك الطبل
علي: لالالالالالالالالا الحييييييييييين بقوم (وينقز علي من فراشه على الحمام سيده
وعقب نزلوا علي وظبية تحت ولقوا امهم يالسة بالصالة
علي + ظبية: صبحج الله بالخير اماية
ام علي: صبحكم الله بالنور يالله تعالوا تريقوا
وعقب ما تريق علي وظبية ساروا صوب العزبة ... وهم في الدرب ظبية ما كانت تتوقع ابد ان سيرتها للعزبة ممكن تغير مجرى حياتها بيصير لحياتها طعم ثاني طعم حلو وطعم مر
ويوم وصلوا العزبة نزلت ظبية من السيارة وسارت سيييده صوب الخيول وشافت فرسها اسمها نجمة ولونها اسود وبين عيونها خط ابيض عريض شوي ...يلست ظبية تاكل نجمة وعقب ما خلصت قالت لعلي: انا بسير اتمشى شوي
علي : انزين بس لا تروحين بعيد
ظبية: انشااااااااالله على هالراس من فوق
وسارت ظبية تتمشى وقالت في خاطرها ليش ما اعق النعال الرمل ناعم وما فيه حصى وايد وفعلا سارت ظبية وعقت نعالها ودسته ... وكملت دربها وتمت تفكر في مايد وتقول في خاطرها: ياربي ليش يعاملني مايد بهالطريقة وليش هو قاسي ما يرحم ودام انها ما يحبني ليش ما قول لابوه انه ما يباني وظلت تساؤلات في ذهن ظبية ما تعرف شو جوابها وفجأة تصرخ ظبية صرخة قويييييييييييييييييييية

:×:×: الجزء الثالث :×:×:


صرخت ظبية صرخة قويييييييييييييييييييييية ويوم جافت ريولها لقت عقرب قارصنها ويلست في الرمل وتمت تصيح وتصارخ لان الالم كان قوي عليها ومن حسن حظها ان سهيل وفاطمة من جماعة حمد من سيف موجودين في عزبتهم واول ما سمعوا الصريخ ركضوا يشوفوا شو السالفة ويوم شافوا ظبية ربعت فاطمة صوبها وحطت ايدها تحت راسها وسهيل بطل غترته وربطها في ريل ظبية وعقب فاطمة ساعدت ظبية انها توقف وسندت ظبية على جتف فاطمة
فاطمة: سلامتج يالغالية
ظبية: الله يسلمج
سهيل: ما تشوفين شر
ظبية: يعل الشر ما ييك...اسمحلي اخوي غترتك اتخيست
سهيل: مسموحة اختي مب مهم غترتي المهم انج تصيرين بخير
فاطمة: ما قلتيلي بنت منو انتي
ظبية: ظبية بنت راشد بن سعيد
فاطمة: والنعم والله ... وانا فاطمة بنت حمد بن سيف وهذا اخوي سهيل
ظبية: هلا فيكم
فاطمة: يالله الغالية دلينا وين عزبتكم عشان نوديج
ظبية: لا مافي داعي مشكورين اروم امشي لروحي الالم خف شوي
سهيل: ما يصير لازم نكمل الواجب معاج
فاطمة: هي صج ما يستوي حبيبتي
ظبية وهي متفشلة: انزين نعالي انا خاشتنه
فاطمة وهي مبتسمة: ما عليه بنييبه في دربنا
ظبية: انزين اخوي علي يترياني واكيد الحين يحاتي
ويوم وصلوا عزبة قوم ظبية شافهم علي
علي وهو زايغ على اخته: ظبوي شفيج
ظبية: لا تخاف علي بس عقرب قرصني فريلي وهالريال النشمي هو واخته ساعدوني يزاهم الله خير
علي: مشكور ياخوي والله انك ريال والنعم فيك يا أخ .....
سهيل: اسمي سهيل بن حمد بن سيف
علي: والنعم والله وانا علي بن راشد بن سعيد ومشكوريين مرة ثانية يا سهيل
سهيل: افا عليك يا علي احنا ما سوينا الا بالواجب وانته الحين خذ اختك وودها المستشفى للحتياط
علي: انشالله
وقبل لا يروح سهيل خذ رقم علي ونفس الشي علي خذ رقم سهيل وسلموا على بعض وتوادعوا وفاطمة وصت ظبية انها ادير بالها على عمرها
وركبت ظبية السيارة عشان بتسير المستشفى وهم في الدرب
علي: ابا افهم بس كيف العقرب قرصج
ظبية وفيها ضحكة بس حابستنها: عقيت نعالي
توقعت ظبية ان علي بيهزبها لكنه نقع من الضحك عليها وهاذيج الساعة طلعت ظبية كل الضحك اللي ماسكتنه رغم الالم اللي تحس به في ريلها ويوم وصلوا المستشفى عالجوا ظبية ولفوا لها ريلها وعطوها شوية مسكنات في حالة انها اذا حست بالم وادوية عشان الجرح
ويوم دخلت ظبية الصالة لقت امها وابوها ويوم شافت امها ريل بنتها
ام علي: ويه ويه اسم عليج يا بنتي ش استوا
ظبية وهي مبتسمة: اماية ما فيني شي بس عقرب قرصني
بو علي وقلبه يعوره على بنته: وتعورج ريلج الحين غناتي؟
ظبية: شوي بس
ونزلت منى من فوق وشافت ظبية واتخبرت هلها عن السالفة وقالوها ولوت منى على ظبية
منى وهي لاوية على ظبية: ما تشوفين شر حبيبتي
ظبية: يعل الشر ما ييج
منى: تعالي غناتي بوديج فوق عشان ترتاحين وطلعت منى وظبية فوق وابوهن يشوفهن ويقول: الله يخليكن لبعض
ام علي+ علي : اااااميييييييييين
علي: ابويه
بو علي: عونك يا ولدي
علي: يوم العقرب قرص ظبية ساعدوها عيال حمد بن سيف ولده سهيل واخته واحنا لازم نردلهم يميلهم
بو علي: صدقت الظاهر انهم ناس اياويل وحنا لازم نعزمهم ونشكرهم...بس جني سامع بهالعرب بس مب متذكر
علي:المهم متى ادق للريال عشان اخبره
بو علي: دق له باجر وقوله يوم الخميس
علي: خلاص صار يا ابوي
في غرفة ظبية في الليل
منى: بعدج تتالمين حبيبتي
ظبية: لا حبيبتي خف الالم
منى: الحمدلله
ظبية: منى
منى: عيونها
ظبية: تسلم لي عيونج بس في شي حاز بخاطري وودي اقوله لج ومتضااااااااايقة ومب قادرة اقوله لاي مخلوق لكن امنتج يا منى ما تخبرين حد بالكلام اللي بقوله لج لانه كلام مب شوي
منى بخوف: قولي حبيبتي اطمني بس شو بلاج وشو اللي مضايقنج
ظبية بترددك: ما ما....مايد
منى: شو بلاه
وخبرت ظبية منى عن طريقة معاملة مايد لها والكلام اللي قاله لها في المول
وتكمل ظبية: بس تدرين يوم جفت سهيل ما ادري صابني شعور غرييييييييب كيف اوصفه شعور اول مرة احس به حسيت وهو يربط ريلي اني طاااااااايرة في السما رغم الالم اللي احس به
منى: حبيبتي الشعور هذا له اسم واحد مستحيل أي كائن في الدنيا يغيره اللي هو (حب من اول نظرة)
ظبية عقدت حواجبها ويلست اطالع ختها وملامح التساؤلات باينه بويهها
من جهة ثانية بعيد عن ظبية وهلها... في عالم ثاني كان سهيل بروحه وبعقله وبقلبه يفكر في ظبية ...يفكر في الانسانة اللي سحرته بجمالها وبعيونها الوساع العسليات ولونها الحنطاوي
سهيل في خاطره: آآآآآآآآآآه والله طحت يا سهيل ومحد سم عليك ... ملكتي قلبي يا ظبية يعني صرت اقدر اعترف لنفسي واقول اني احبج
ظبية كانت يالسة في غرفتها وتفكر في كلام منى معقولة انا احب سهيل لالالالالالا مستحيل حبنا اصلا... لا اكيد انا ما حبه ... اففففففف يا ظبية لا تقصين على عمرج انتي تحبينه نبضات قلبج تقول جي ... عيونج ... عيونج يا ظبية تقول احبه
وتنهدت ظبية تنهيده حاااااااااااااااااارة : صدق ان الحب يحتل القلب بدون انذار ولا تحذير وبعدين كان وايد ضروري اني اعق نعالي وهالعقرب مالقى غير ريلي انا بس يقرصها كان سار صوب حد ثاني بس حبي لسهيل شي مستحييييييييييييييييييييييييل
اليوم الثاني
علي يتصل حق سهيل
علي: مرحبا مليون
سهيل: مراحب هلا وغلا بعلي
علي: شحالك سهيل
سهيل: بخير يعلك الخير انت شحالك
علي: والله بخير وسهالة اقول الطيب
سهيل: امر
علي: ما يامر عليك عدو بس الوالد عازم ابوك وانت والاهل
سهيل: الوالد عطاك عمره وما عندي غير الوالده واختي بس
علي: الله يرحم الوالد ويغمد روحه الينه ... زين شاور امك ورد عليه
سهيل: آآآآآآآآمين...انشالله بشوف الوالده وبخبرك
ويوم سكر علي عن سهيل سار وخبر ابوه وامه
ام علي : مب مشكلة جان بييونا حياهم الله ... انا بسير اطمن على ظبية
بو علي : وانا ساير وياج
علي: لحظة خذوني وياكم
وطلعوا كلهم فوق ولقوا منى يالسة عند ظبية
ام علي: ها ظبوي شو ريلج الحين
ظبية: الحمدلله اماية ما احس باي الم
بو علي: انزين ما ترومين تمشين عليها ؟
ظبية: يوم امشي اعري لانها ما خفت كليا
علي: اصلا ريلها مافيها شي بس هي مبزاية
ام علي: خلها براحتها هي ومنى مبونهن مبزايات علني فداهن (وتلوي ام علي على بناتها )
علي: شو ها وانا محد يلوي علي
بو علي: هههههههههه تعال انا بلوي عليك
علي هههههههههههههه (ويعق علي عمره على ابوه ) هههههههههههههههههههه
وفجاة يرن تلفون ظبية
ظبية بعصبية: الو
شيخة : بسم الله علينا شو بلاج شوي وبتاكليني
ظبية: هي باكلج ولو انه طعمج مب حلو
شيخة: يمييييي ليش شسويت
ظبية: عنبو حتى كلمة سلامات ما سمعتها منج
شيخة: بسم الله عليج شو بلاج
ظبية: طبيعي ما تعرفين مقاطعتني امس ما دقيتي.... شفتي لو انج لو طوفتي يوم من غير ما ترمسيني بتفوتج علومي
شيخة : خير شو مستوي
ظبية: ماشي بس قرصني عقرب امس في العزبة
شيخة تشهق وتضحك في نفس الوقت: حلفيييييييي
ظبية: جيه مب مصدقة
شيخة: لا لا مصدقة سلااااااااامتج وما تشوفين شر
ظبية: الله يسلمج
وتمن يسولفن شوي ويتقارضن وعقب سكرت ظبية عن شيخة
وبعد ما سكرت ظبية من شيخة رن موبايل علي
علي: هذا سهيل (هني فز قلب ظبية يوم سمعت اسمه)
وتمت ظبية سرحانه تفكر في سهيل وقطع علي حبل افكارها لما قال : ابويه خلاص بييون يوم الخميس على الغدا
بو علي وام علي : يا حياهم
ظبية: ليش انتوا عزمتوهم ؟
بو علي: يا بنتي الناس سووا الواجب وياج والمفروض نرد لهم الجميل
منى: صدقت يا بوي بس وين بتسووا الغدا هني ولا في المطعم
بو علي: في المطعم
منى : خلاص عيل انا بقطع السلطة
ظبية: وانا بسوي الفطاير
ام علي: لا يابنتي انتي تعبانة ما تسوين شي انا اللي بسوي
منى: امايه لا انتي ولا هي انا اللي بسوي كل شي
ظبية: لالا على الاقل خلوني اسوي ولو شي بسيط
ام علي: براحتج يابنتي
وعقب كلهم ظهروا من عند ظبية عشان يخلوها ترتاح وترقد بس الرقاد ما يدل طريج لعين ظبية ... عين ظبية اللي ما ذاقت طعم الرقاد من ملك سهيل قلبها وتذكرت ظبية غترته شلتها وحضنتها وقالت : آآآآآآآآآآآآآآه يا سهيل سرت وشليت قلبي وياك ليتك تقدر ترده لي ليتك وعقب قالت ظبية في خاطرها يمكن حبي لسهيل ولو انه مستحيل نكون لبعض بس ممكن على الاقل يواسيني ويداوي جروحي من كلام مايد

ومن جهة ثانية مايد يالس يخطط ويفكر عشان يادب ظبية ... مايد ما يحب ظبية بس هو نفسه ما يدري ليش يعاملها جي يمكن يبا يتسلى لكن الله فوق وما بيرضى بظلم مايد لظبية وبيعاقبة